ماري منيب، كوميديانة دمها خفيف، أشهر من قدمت دور الأم والحماة فى السينما المصرية ــ ولدت فى مثل هذا اليوم عام 1905 ــ ورحلت عام 1969 في سوريا من أسرة لبنانية، انتقلت بعدها إلى القاهرة، حيث عاشت فى شبرا، وعملت بالمسرح والسينما. 

اشتهرت ببراعتها فى تجسيد دور الحماة النكدية، ورغم من خلال مجموعة مقالات نشرتها أهل الفن عام 1956 تحمل جميعها وصايا للشباب المقبلين على الزواج، وللسيدات المتزوجات وثالثة للحموات.

فى المقالة الأولى الموجهة للمقبلين على الزواج كتبت تقول: “كل عريس جديد أو على وش جواز لازم يعمل حسابه يبقى حمش قدام مراته من أول يوم جواز، لأنه كل شيء حايرجع لطبيعته بعد شهر العسل وستختلف العروس فى نظام حياتها والشاطر هو اللى يقدر يخليها تغير نظام حياتها وتتبع نظام جوزها علشان يعيش الاثنين عيشة هنية، وعلى الزوج أن يحترم زوجته حتى يمنع طولة اللسان ويعاملها برقى واحترام، يغير على مراته حتى تشعر بوجودها، وأن يكون هو الراجل فى كل شيء ما عدا إدارة المنزل، ويفهم ان الراجل بحر والمرأة قناية فلا يبخل عليها”. 

احكِ لها أسرارك

تضيف مارى منيب: “أيضًا لا يعارضها فى كل حكاية تقولها حتى لو كانت خطأ بل يتفاهم معها بدون عصبية، ويقنعها وطبعًا عقلية الرجل أكبر من عقلية المرأة، يجب أن يفهمها أسرار حياته الداخلية والخارجية حتى تطمئن عليك وتتأكد من ثقتك فيها وأيضا ما يحبش ولاده أكثر منها”.

وتوجه مارى منيب رسالة إلى العرسان وتقول: “بعد سنتين ثلاثة حتبقى حياتك معاها عشرة والعشرة فيها شيء من الإهمال، فعليك أن تجتهد فى إنك لا تهملها ولا تشعرها بالإهمال، وضرورى يبين لها الحب والغرام ــ ولو أنه كلام فى سركم ــ حيبقى مفيش وحتبقى الحكاية أخوة، وأخيرا الرجال قوامون على النساء واللى تزعل تتطق وتتفلق، أنا زعلت وطقيت واتفلقت قبل منكم”.

نصائح لربة البيت 

وللسيدات المتزوجات فى بيوتهن كتبت تقول: “النظافة النظافة ياستات كسفتونا، النظافة هى سلوك بإيدك مش بإيد حد تانى، وأنت الوحيدة المتحكمة فيها، فالست هى اللى لازم تهتم بالنظافة وأول خطوات النظافة مكافحة الذباب، السبب الرئيسى فى جميع الأمراض المعدية والمستعصية، الذبابة تقف اسم الله على مقامكم على الحاجة الوحشة كلام فى سركم، وبعدين تيجى على حد تانى يا ساتر علشان كده لازم أموتها. إن كنت ست غنية وعندى خدم لازم أراعى بيتى بنظرى على كل صغيرة وكبيرة، وأراعيه بإيدى إن كنت ست متوسطة الحال، وبكده أضمن صحتى وصحة جوزى وأولادى، دى أهم حاجة، والحاجة الثانية مجموعة وصايا لو قدرت أى ست تنفذهم تضمن أنها تحافظ على بيتها، أولا حطى على الشباك ستاير سلك بين الخشب والزجاج ومش حايكلفك أكثر من خمسين قرش”.

التخلص من الزبالة أولا بأول 

تقول ماري منيب: “ثانيا الزبالة موش لازم تتواجد فى البيت إطلاقا، لازم يكون عندك زبالة بغطاء محكم سعرها موش حايزيد عن سبعين قرش إلى جانب استمرار تطهير البيت من الحشرات بالفليت وثمنها 18 قرشا فقط، وللجو الصحى لازم  كل يوم تفتحى الشبابيك الصبح تهوى الحجرات واتركى بعدها جزء صغير من الشباك مفتوح وهشى الطير واطفى النور لأنه بيكره الضلمة”. 

وتتابع: “لا تتركى اللحوم والحلويات وأطباق الطعام عمومًا مكشوفى بدل ما تبقى غذاء للدبان وأمراض لأهل بيتك. ثامنا امنعى الأولاد تمامًا من شراء الجيلاتى أو الدندورمة أو أية مأكولات من الشارع لأنها مليانة ميكروبات وجراثيم وأمراض فتاكة”.

نصائح للحموات الفاتنات 

وللحموات الفاتنات كتبت مارى منيب مقالتها الثالثة تقول: “مرات ابنك مش عدوتك ولا جاية تاخد ابنك منك، عامليها زى بنتك، لما تغلط مش لازم تقومى ابنك عليها، عاتبيها بينك وبينها، وفوتى عشان انت الكبيرة، ولما ابنك يقولك واحشنى اكلك مش لازم تتنفخى زى الديك الشركسى وتقوليله لما تحب تاكل حاجة تعالى لى، ده كيد نسا، قوليله مراتك اكلها حلو بس كل واحد له طريقة وبكرة تتعود على طريقتنا، ولما مرات ابنك تيجى لك طلعى أكل حلو محبكش العدس والكشرى والرنجة، ياستى زى ما بتعملى مع بنتك وجوزها، مرات ابنك مالهاش ذنب ان حماتك كانت قاسية عليكى، ولما ابنك يجيب لمراته دهب ما تتقهريش علشان بيبان عليكى قوى وقولى لها تعيشى وتتهنى”

حبي زوجة ابنك 

وفى النهاية تقول مارى منيب: “مش لازم تقعدى تحكى لابنك عن مرار أخواته البنات وأنهم بيضحوا كتير، حبى مرات ابنك من قلبك وافتكرى أنها بقت جزء من ابنك”. 

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوداث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.